الجامعۃ المحمودیۃ الاسلامیۃ ، چندرپور

 (نزد جمشیدپور)

ایک ایسا تعلیمی و روحانی و تربیتی ادارہ ہے جو ایمان کی روشنی کو دور دور تک پھیلانے کے لیے ہمیشہ تیار رہا ہے۔ یہ ادارہ حضرت مولانا مفتی زین العابدین صاحب دامت برکاتہم (خلیفہ و مجاز حضرت مولانا ابراہیم صاحب افریقی دامت برکاتہم)خطیب و امام آمبگان مسجد، ساکچی، جمشیدپور کی مخلصانہ قیادت میں پورے آب و تاب کے ساتھ دین کی خدمت انجام دے رہا ہے۔

یہ صرف ایک مدرسہ نہیں، بلکہ ایک ایسا چشمۂ فیض ہے جہاں سے علم، کردار اور روحانیت کی نہریں نکلتی ہیں اور امت مسلمہ کی تشنگی کو دور کرتی ہیں۔ یہاں کے تربیت یافتہ افراد صرف طالب علم نہیں، بلکہ دین کے سپاہی ہیں، جو دنیا کے ہر کونے میں اسلام کی حقانیت کا پرچم بلند کر رہے ہیں۔ ان شاء اللہ، یہ مبارک سلسلہ ہمیشہ جاری رہے گا۔

مدارس کی تاریخ میں یہ بات تسلیم شدہ ہے کہ یہ ادارے صرف علوم کے مراکز نہیں بلکہ انسانیت کی تعمیرگاہیں ہیں۔ ان کی بنیاد اس عظیم سوچ پر رکھی گئی ہے کہ یہاں ایسے افراد تیار ہوں جو علم کی روشنی کے ساتھ ایمان کے چراغ جلائیں، کردار کی بلندیوں کو چھوئیں، اور امت کی قیادت کا فریضہ انجام دیں ۔ جیسا کہ مفکر اسلام مولانا سید ابوالحسن علی ندویؒ نے فرمایا:
“مدرسہ وہ جگہ ہے جہاں آدم گری اور مردم سازی کا کام ہوتا ہے جہاں دین کے داعی تیار ہوتے ہیں ، وہ کارخانے ہیں جہاں قلب ونگاہ اور دماغ ڈھلتے ہیں، انسانی زندگی کی نگرانی ہوتی ہے۔”

جامعہ محمودیہ کی نسبت کسی زبان، علاقے یا ثقافت سے نہیں بلکہ براہِ راست نبوتِ محمدی صلی اللہ علیہ وسلم سے ہے، جو رہتی دنیا تک عالمگیر رہنمائی کا سرچشمہ ہے۔ یہ ادارہ ہماری تہذیبی وراثت اور ایمان کی حفاظت کا ایک ایسا قلعہ ہے جس کا مضبوط ہونا پوری امت کی بقا اور ترقی کی ضمانت ہے۔

اس لیے یہ ہماری ذمہ داری ہے کہ ہم نہ صرف اس جامعہ کی حفاظت کریں بلکہ اسے اس طرح مضبوط کریں کہ یہ ایمان و علم کا مینار ہمیشہ روشن رہے اور آنے والی نسلیں اس کی روشنی میں اپنی منزلیں طے کرتی رہیں۔ جامعہ محمودیہ، دین کے وہ نگہبان تیار کر رہا ہے جو صدیوں تک امت کی رہنمائی کرتے رہیں گےان شاءاللہ۔